श्रावण ३२ गते, २०७६

निगमको पैसामा जापान जाने दाउमा मदन खरेल

पटक हेरिएको

काठमाण्डौ । नेपाल वायुसेवा निगमले वाइडबडी एयरबस ३३० बाट जापान उडान गर्ने भने पनि उडान सुरु हुनु अघि नै काठमाडौं-ओसाका उडान स्थगित भयो। निगमले एक महिनासम्म टिकट बुकिङ खुला गर्दा पनि राम्रो बुकिङ नभएको भन्दै उडान स्थगन गरेको थियो।

निगमले सेप्टेम्बरमा अर्को सिजन सुरु हुने भएकाले अगस्टको अन्तिमबाट उडान सुरु हुन सक्ने बहाना पनि बनायो। सातामा तीन राउन्ड उडान गर्ने गरी जापानले नेपाल वायुसेवा निगमलाई ओसाकास्थित कान्साई विमानस्थलमा उडानको अनुमति दिएको थियो।

तर निगम भित्रकै कर्मचारीहरुले बल्ल-बल्ल जापानबाट पाएको उडान अनुमति उडान सुरु नहुँदै स्थगन हुनु निगम व्यवस्थापनको असफलता रहेको आरोप लगाउँदै आएका छन्। यि घटनाक्रमकाबीच अहिले निगमका कार्यकारी अध्यक्ष जापान जाने प्रयासमा छन्। तर उनी जापान गएर स्थगित भएको उडान संचालन गर्नुको सट्टा सम्भावित उडान समेत रद्ध गर्न खोजि रहेका छन्।

जुलाई ४ देखि हुने भनिएको उडान नहुँदा निगम थप घाटामा जाने त पक्कापक्की नै छ, अबको सम्भावना पनि टार्नका लागि खरेलले चलखेल गरेको निगम भित्रकै केही कर्मचारीले बताउने गरेका छन्। अहिले खरेल ३ जनाको टोली लिएर जापान जान खोजेको बताइएको छ। यो भ्रमण भयो भने निगमका ४० लाख जति स्वाहा हुने बताइएको छ। अब खरेललाई संसदीय समितिले पनि बोलाएर सोधपुछ गर्ने तयारी गरि रहेको छ।

जापानका लागि निगमका प्रतिनिधि देवमान हिराचनले आफूले पाएको जिम्मेवारी पाएको खण्डमा उडान सफल बनाउने दावी गर्दै आएका छन्। निगमले यात्रु नभएर वा टिकट विक्रि नभएका उडान स्थगित गर्नु परेको बताउँदै गरेका बेला हिराचनले त्यसलाई झुट भएको बताएका छन्।

गैरआवासीय नेपाली संघ (एनआरएनए) का पूर्वअध्यक्ष समेत रहेका हिराचलन जुलाई ४ तारिखबाट गर्ने भनिएको वाईडबडीको उडान स्थगित् गरेकोमा कडा आपत्ति जनाउँदै आएका छन्। उनले नेपाल र जापान दुवै देशका सरकारी तथा प्राविधिक प्रतिनिधि बसेर उडानको लागि मिति नै तय गरिएको अवस्थामा निगमले एक्कासी विना कारण उडान स्थगित गर्नु आफैंमा अशोभनीय भएको टिप्पणी गरेका छन्।

हिराचनले टिकट बुकिङ नभएकै कारण उडान स्थगित् गरिएको भन्ने निगमको भनाईमा कुनै सत्यता नै नभएको जिकिर गरे। केही दिन अघि पत्रकार सम्मेलन गरेर हिराचनले भनेका थिए-‘नेपाल एयरलाईन्सको जापानी टिकट बुकिङ प्रणाली नै तयार भएको छैन। यस्तो अवस्थामा निगमले बुकिङ खुल्ला गर्नु पर्दथ्यो, बुकिङ नै नखुलाई एक्कासी टिकट बुक नभएको बहाना बनाएर ओशाका उडान स्थगित् गर्नु रहस्यमयी छ। यसमा नेपाल सरकार खास गरी सम्माननीय प्रधानमन्त्री केपी शर्मा ओलीज्यूले विशेष ध्यान पुर्याउनु पर्छ।’

उनले नेपाल एयरलाईन्सले जापानसँग उडानको लागि सम्झौता गर्नु ठूलो उपलब्धि भए पनि यसको लागि गर्नु पर्ने आवश्यक धेरै कामहरु नेपालको तर्फबाट द्रुत गतिमा नभएको पनि गुनासो पोखे। उनले थपे, ‘नेपालको तर्फबाट निगमले जतिसक्दो चाँडो प्राविधिक टोली जापान पठाई टिकट बुकिङ प्रणाली सुचारु गर्नु पर्दथ्यो, तर त्यसतर्फ निगमका नेतृत्वले ध्यान दिएन। यही कारण आज निर्धारित मितिमै ओशाका उडान भर्न सकिएन।’

जापानमा भएका पर्यटक विभाग र ट्राभेल एजेन्टबाट डिसेम्बर देखि नै टिकेटको माग आए पछि आशुका ट्राभल एण्ड टुर्सले बारम्बार काठमाडौंमा खबर गर्दा पनि नेपाल वायु सेवा निगमले टिकट चाँडै बजारमा निकाल्नको लागि कुनै चासो नदेखाएको हिराचनको आरोप थियो।

Loading...

प्रतिकृया लेख्नुहोस्: